من طرف 
العين حساسه ومادراك ما العين
تعطي خبر عن ماتكن الضلوعي
ياخذ خبرها نسبه الصدق تسعين
من واقع الحال وصفاه الطبوعي
وعين النصافي يوم رفت لثنتين
اما فرح ولاعلوم تروعي
مقاس الاحساس وصدور البراهين
والتجربه بين الضرر والنفوعي
حياتنا هاذي ميادين تمرين
والسبت مايحلق نهار الربوعي
اسبوعها هالحين ياصقر يومين
وعود شهرها مثل راس السبوعي
مكاره تلبس من المكر وجهين
وتنصب مطبات الخطر للوقوعي
مجنونه والناس فيها مجانين
الا التقيين السجود الركوعي
وجدي علي وقت تقافا من سنين
وهذا مثل ماقلت صعب الرجوعي
احن للماضي حنين المحبين
علي بعضهم يوم فرقا النجوعي
ليا لاح براق من سهيل ويمين
وبرق شمال ونوهو بالنزوعي
ذولا مسانيد وذولاك منحين
ساقتهم اخبار المطر والرجوعي
بدو خلت مرحانهم والمعاطين
ماحولها غير السراب اللموعي
معاد فيها مبرك للبعارين
ولاالغراب اللي عليها يقوعي
تفرقوا كل علي رغبته وين
يتلون شف مذربات السموعي
الوسم طاح وساقوا البوش عجلين
يلعب مغنيهم بروس الفروعي
الا ثنين بالغرام متهاوين
هاك النهار ينزفون الدموعي
هذاه وجدي يازبون المخلين
وانا بوقت منه يصعب طلوعي
صابر وهمي مندفن في الشرايين
لا الوقت وقت لي ولا النوع نوعي
ياصقر سامحني بعد رفت العين
وتم البحر والقافيه والقروعي
ماقول غير الله يحفظ السلاطين
اللي علي شعب الجزيره دروعي
